जनकपुरधाम, ६ असार । जनकपुरधाममा आजदेखी भाटभटेनी सुपर स्टोरको २५औँ शाखा संचालनमा आएको छ ।
भाटभटेनीका संचालक मीन बहादुर गुरुङ र उनकी धर्मपत्नी साबित्री गुरुङले सुपर स्टोरको उद्घाटन गरेका छन् । १ बिगहा १० धुर क्षेत्रफलमा फैलिएको यो स्टोर रहेको छ ।
उद्घाटनका अवसरमा भाटभटेनीले अल्कोहल र निकोटिनमा बाहेक अन्य सामानमा १० प्रतिशत र इलेक्ट्रोनिक सामानमा २० प्रतिशतसम्म छुटको व्यवस्था गरेको भाटभटेनीका संचालक गुरुङले जानकारी दिएको छ ।
ग्राहकलाई सहज सुविधा दिनको लागि जनकपुरधाममा यो स्टोर सञ्चालनमा ल्याइएको उनले बताए । पछिल्लो समय जनकपुरधाम व्यापारीक केन्द्रको रुपमा विकसित हुँदै गईरहेको छ ।
भाटभटेनी स्टोरका नयाँ शाखा पनि संचालनमा आएपछि जनकपुरधामको व्यापारीक क्षेत्रमा नयाँ आयाम थपिएको छ । यसअघि, वीरगञ्जमा पनि भाटभटेनी २४ औं स्टोर सञ्चालनमा ल्याइएको थियोे ।
अब आगामी असोजमा झापाको विर्तामोडमा अर्को स्टोर सञ्चालनमा ल्याउने तयारी रहेको छ ।
