काठमाडौं,६ असार । चीनको छेन्दुबाट आएको सिचुवान एयरलाइन्सको चार्टर्ड विमान पोखरा अन्तर्राष्ट्रिय विमानस्थलमा अवतरण गरेको हो ।
चीनसँग सीमा जोडिएको संखुवासभा हुँदै नेपाल प्रवेश गरेको जहाज बुधवार बिहान ९ बजेर ६ मिनेटमा पोखरा विमानस्थलमा अवतरण गरेको छ । १ सय ३० जना आउने भनिएको विमानमा कतिजना आएका छन् खुलेको छैन ।
चीन भ्रमणमा रहेका राष्ट्रियसभा अध्यक्ष गणेशप्रसाद तिमिल्सिनासहित नेपालका सांसद, चिनियाँ पर्यटक र खेलाडी उक्त विमानमा पोखरा आएका छन् ।
अध्यक्ष तिमिल्सिना, सात सांसदसहित ९ जना गत २७ जेठमा काठमाडौंबाट चीन भ्रमणमा गएका थिए । उनीहरू त्यही विमानमा पोखरा आएका हुन् ।
विमान पोखरामा एक घण्टा होल्ड हुनेछ । त्यसपछि त्रिभुवन विमानस्थलमा अवतरण भई नियमित उडानमार्फत् चीनको छेन्दु फर्किने छ । गत १७ पुसमा सञ्चालनमा आएको विमानस्थलमा चीनको छेन्दु–तियान्फु विमानस्थलबाट पहिलो अन्तर्राष्ट्रिय चार्टर्ड उडान भएको हो ।
पोखरा अन्तर्राष्ट्रिय विमानस्थलको प्रधानमन्त्री पुष्पकमल दाहाल प्रचण्ड ले उद्घाटन गरेका थिए । विमानस्थल २२ अर्ब लगानीमा निर्माण भएको हो ।
विमानस्थल उद्घाटनको दिन हिमालय एयरलाइन्सले परीक्षण उडान गरेको थियो । त्यसयता सिचुवान एयरलाइन्सको पहिलो अन्तर्राष्ट्रिय उडान हुन लागेको हो ।
चीनको सिचुआन एयरलाइन्सको आज चार्टर्ड उडानका लागि नेपाल नागरिक उड्डयन प्राधिकरण र सिचुआन एयरलाइन्सबीच यही असार १ गते सम्झौता भएको थियो ।
उक्त एयरलाइन्सले चीनको छेन्दुबाट पोखरा अन्तर्राष्ट्रिय विमानस्थलमा चार्टर्ड उडानका लागि अनुमति पाएको थियो । नेपाल पर्यटन बोर्ड, नेपालस्थित चिनियाँ दूतावास र पोखरा महानगरपालिकाको आयोजनामा फेवातालमा बोट रेस र फेवाताल किनार क्याम्पिङ चोकमा फेस्टिभल सञ्चालन हुने बोर्डका प्रमुख कार्यकारी अधिकृत धनन्जय रेग्मीले बताए ।
