जनकपुरधाम, ६ असार । जनकपुरधाममा पहिलो पटक मिथिला खाना परिकारको होटल ‘मिथिला थाली’ संचालनमा आएको हो ।
अन्तराष्ट्रियस्तरमा नाम कमाएको मास्टर सेफ सन्तोष साहले संचालनमा ल्याएको मिथिला थाली होटलमा विशुद्ध मिथिला परिकारका खाना पाउनुका साथै खाना परिकारका समानहरु समेत त्याहाँ पाउने भएको छ । 
विलुप्त हुँदै गएको बथुवा सागको बिरियाको सब्जी, तिलौरी, दनौरी, फुलौरी, ओलको तरकारी, अचार,आलुको अचार,बडीकढी लगायतका परिकारलाई ताजापन गर्न र विश्वस्तर समक्ष पुरयाउने उद्देश्यले मिथिला थाली नामक होटल संचालनमा ल्याएको संचालक सेफ साहले बताउनुभएको छ ।
‘जनकपुरधाम हाम्रो मिथिलाको प्रमुख केन्द्रबिन्दु भएकाले यहाँबाट हामीले सुरुवात गरेका छौं । ५ वर्षभित्र नेपालका काठमाडौ, धरान, नारायणघाट, नेपालगञ्ज लगायतका प्रमुख शहर सहित बिभिन्न देशमा एक सय मिथिला थाली शाखाको बिस्तार गर्ने तयारीमा छौं साहले भने, । 
साथै उनले नेपाल, भारत , बंगलादेश,पाकिस्तान सहितका भात दाल प्रेमी मान्छेहरुको बाक्लो उपस्थिती रहेकोले दोहा कतारमा पनि मिथिला खाना परिकारको यस्ता होटेल तथा रेष्टुरेन्ट संचालनमा ल्याउने जानकारी दिएका छन । 
मिथिला थाली होटलमा घर जस्तै परम्परागत रुपमा माटोको चुल्होमा पकाउने, तरकारीको मसला सिलौटामा पिसेर प्रयोग गर्ने, बिरिया, तिलौरी, फुलौरी र आमको आचार बजारबाट नकिनेर गाउँघरमा बनाइएको किनेर प्रयोग गर्ने साहले बताए । 
शाकाहारी थाली तर्फ मात्र २ सय ५० रुपैयामा दाल, भात, बिरिया सहितका अन्य तरकारी, भुजिया, पापर, साग, चोखा, आचार, दही, बडकढी, सेबई खिर सहित १७ प्रकारका परिकार दिइने साहले जानकारी दिए । 
