काठमाडौं,१५ बैशाख । उपनिर्वाचनबाट निर्वाचित भएका दुई जना प्रतिनिधि सभा सदस्यहरुको शपथग्रहण आज हुँदैछ ।
चितवन २ बाट निर्वाचित रवि लामिछाने र तनहुँ १ बाट निर्वाचित स्वर्णिम वाग्लेले आज १२ बजे शपथ ग्रहण गर्न लागेको संघीय संसदका सहसचिव एकराम गिरीले जानकारी दिनुभएको छ ।
उनीहरुलाई कानून न्याय तथा मानवअधिकारको हलमा सभामुख देवराज घिमिरेले पद तथा गोपनीयताको शपथ खुवाउने छ । चितवन २ बाट निर्वाचित रास्वपा सभापति रवि लामिछानेको नागरिकता विवादका कारण पदमुक्त भएकाले यही वैशाख १० गते उपनिर्वाचन गरिएको थियो ।
उपनिर्वाचनबाट लामिछाने पुनः सांसदमा निर्वाचित भएका छन । यसैगरी तनहुँ १ बाट निर्वाचित रामचन्द्र पौडेल राष्ट्रपति बनेपछि कांग्रेस त्यागेर रास्वपामा गएका वाग्ले निर्वाचित भएका छन ।
बारा २ बाट निर्वाचित सांसद उपेन्द्र यादव काठमाडौं बाहिर भएकोले उनको शपथ नहुने भएको गिरीले जानकारी दिनुभएको छ ।
