जनकपुरधाम – महोत्तरीको सोनमा गाउँ पालिकाले करिब १३ लाख इन्धनमा खर्च गरेको छ । चालु आर्थिक वर्षको माघ महिनासम्म सो रकम खर्चिएको गाउँ पालिकाको कार्यालयले जनाएको छ ।
सोनमा गाउँ पालिका १ बस्ने रविकान्त झाले सो पालिकाको नाममा सम्बोधन गर्दै राष्ट्रिय सूचना आयोगमा सूचना माग गरेका थिए । झाको मागलाई सम्बोधन गर्दै आयोगले फागुन २ गते पालिकाको कार्यालय सूचना उपलब्ध गराइदिन पत्र पठाएको थियो । 
पालिकाको कार्यालयले पठाएको जवाफमा ९ महिनाको अवधिमा इन्धनमा मात्रै १२ लाख ९८ हजार ४९७ रुपैयाँ खर्चेको जनाइएको छ । सो अवधिमा पालिकाले कार्यालय मसलन्द खर्चको नाममा पनि करिब २ लाख खर्च भएको जनाएको छ ।
कार्यालयले जनाएअनुसार १ लाख ९० हजार रकम मसलन्दको नाममा खर्चिएको छ । पालिकाका प्रमुख प्रशासकीय अधिकृत शम्भु प्रसाद यादवले फर्काएको जवाफमा करार र ज्यालादारी कर्मचारीको विवरण पनि उल्लेख छ ।
सो विवरणमा आवश्यकभन्दा बढी संख्यामा ज्यालादारी कर्मचारी राखिएको देखिएको छ । करारतर्फ ४ र ज्यालादारीतर्फ ७ गरी ११ जना कार्यालय सहयोगी मात्रै खटाइएको छ । 
पालिकामा सेवा विस्तार गर्न कर्मचारी भर्ना गर्नु पर्नेमा नजिकका र पहुँचबालाको नै बोलबाल रहेको पाइएको छ । पालिकाले आर्थिक गतिविधि, योजना छनोट तथा कार्यान्वयन, चालु योजना, फछ्र्यौट योजना, कर्मचारी संख्या, स्वास्थ्य र शिक्षाको क्षेत्रमा भएको लगानी, कृषि तथा पूर्वाधार लगायत लगानी हुने अन्य विवरण भने सार्वजनिक गरेको छैन ।
