जनकपुरधाम,१० फागुन । मधेस प्रदेशका सभामुख रामचन्द्र मण्डलले मैथिली भाषाको उत्थानका लागि ३० लाख रुपैयाँको सहयोग गर्ने भएको छ ।
मैथिली विकास कोषले अन्तर्राष्ट्रिय मातृभाषा दिवसको अवसरमा आयोजना गरेको ‘मातृभाषामे शिक्षा’ विषयक कार्यक्रममा मन्तब्य राख्दै सभामुख मण्डलले आफ्नो संसदीय कोषको रकमबाट सहयोग गर्ने जनाएका हुन् ।
सभामुख मण्डलले प्रदेशको कामकाजी भाषाको विषयमा निष्कर्ष लगाउन आफू गम्भीर रहेको पनि बताउनुभयो । मण्डलले यही कार्यकालमा प्रदेशको कामकाजी भाषाको निष्कर्ष लगाइने दाबी गरेका छन ।
उनले मैथिली भाषालाई सबै जातजातिको हृदयमा वास गर्ने गरी बनाउनका लागि भाषाको सहजीकरण तर्फ ध्यान दिन आग्रह गरे । उनले मैथिलीलाई कुनै दायरामा नबाँधेर भाषाको सहजीकरण गरी आमजनताको भाषा बनाउनु पर्नेमा जोड दिएका छन ।
पुर्ब राष्ट्रपति डा. रामावतार यादवले असंख्य आमाहरु नै आफूले बोलिरहेको भाषाको विषयमा जानकार नहुनु दुःखद् रहेको बताउनुभयो । आमाहरु नै भाषाको विषयमा जानकार नरहेकाले मातृभाषाप्रतिको अस्पष्टता बढिरहेको उनले बताएका छन ।
उनले सन १९५२ फेब्रुअरी २१ मा बंगलादेशको ढाका विश्वविद्यालयमा भएको भाषिक आन्दोलनमा पाँचजनाले शहादत दिएपछि मातृभाषा संस्थागत रुपमा अभियान भएको र पछि सोही दिनमा दिवसको रुपमा मनाउन थालिएको जानकारी दिए ।
कोषका अध्यक्ष जीवनाथ चौधरीले संघीय प्रणालीमा पनि पञ्चायतकाल जस्तै सडक र नालाकै विकास प्राथमिकतामा पर्ने गरेकाले पहिचान, भाषा र संस्कृति संकटमा परिरहेको बताउनुभयो । कार्यक्रममा जनकपुरधाम उपमहानगरपालिकाका बिभिन्न संघ संस्थाका प्रतिनिधिहरुको उपस्थिति रहेको थियो ।
