काठमाडौं ९ माघ । राष्ट्रिय स्वतन्त्र पार्टी (रास्वपा)ले संगठन विस्तार अभियान चलाउने रास्वपाले जनाएको छ । पार्टीको केन्द्रीय समितिको बसेको बैठकले देशभर पार्टी विस्तार गर्ने निर्णय गरेको छ ।
चैतसम्म जिल्ला समिति गठन र आगामी जेठ मसान्तसम्म पालिका र वडास्तरीय समितिं गठन गर्ने निर्णय रास्वपाले गरेको बताएको छ । यही माघ महिनाभित्र सबै प्रदेशमा विस्तारित बैठक गरी प्रदेश समितिको पुनर्गठन गर्ने निर्णय गरिएको प्रवक्ता मुकल ढकालले जानकारी दिनुभएको छ ।
बैठकले प्रदेश समितिको विस्तारित बैठकको मिति पनि तय गरेको छ । माघ १४ गते प्रदेश १ को विराटनगर, १६ गते मधेश प्रदेशको जनकुपुरधाम, १८ गते बागमती प्रदेशको मकवानपुर, २१ गते गण्डकीको पोखरा, २४ गते लुम्बिनीको दाङ, २६ गते सुदूरपश्चिमको धनगढी र २८ गते कर्णालीको सुर्खेतमा बैठक बस्ने तय गरेको प्रवक्ता ढकालले बताएको छ ।
