जनकपुरधाम १६ मंसिर । नेकपा एमालेका मधेश प्रदेशका ईन्चार्ज रघुवीर महासेठले मधेशको विकास, निर्माण तथा समस्या समाधानमा नेकपा एमालेले लिएको चासोका कारणले प्रदेशमा ठूलो पार्टी बन्न सफल भएको बताए । नेपाल प्रेस चौतारी धनुषाले शुक्रवार जनकपुरधाममा आयोजना गरेको पत्रकार सम्मेलनमा नवनिर्वाचित सांसद समेत रहनुभएका महासेठले जनताको विश्वास तथा भरोसामा एमाले आगामी दिनमा साथ रहने भन्दै नागरिकता समस्याको समाधान सरकार बनेको तीन महिनामा नगरेको खण्डमा पार्टी मधेश प्रदेशमा आन्दोलनमा उत्रने बताए । उहाँले मधेश प्रदेशमा नेकपा एमाले ठूलो दल भएकोले प्रदेशको मुख्यमन्त्री हुने स्वभाविक भएको भन्दै यस विषयमा अरु दलसंँग सहकार्य हुने र यसका लागि सम्पूर्ण मत परिणाम आउन जरुरी रहेको बताएका छन । प्रेस चौतारी नेपाल धनुषाका जिल्ला अध्यक्ष अवधेश कामतको अध्यक्षतामा भएको पत्रकार सम्मेलनमा नव निर्वाचित प्रदेशसभाका सदस्य दिपेन्द्र ठाकुर,संतोष यादब सहितका नेताहरुको उपस्थिति रहेको थियोे ।
एमाले मधेशको ठुलो दल : महासेठ
