काठमाडौं, १६ कात्तिक । हिउँदयाम सुरु भएसँगै आजदेखि देशभरका सरकारी कार्यालयको सञ्चालन समय परिवर्तन भएको छ। नयाँ व्यवस्थाअनुसार अब सरकारी कार्यालय बिहान ९ बजेदेखि अपराह्न ४ बजेसम्म मात्र खुल्नेछन्।
सरकारले कात्तिक १६ गतेदेखि आगामी माघ १५ गतेसम्मका लागि कार्यालय समय एक घण्टा घटाएको हो। यसअघि सरकारी कार्यालय बिहान ९ बजेदेखि साँझ ५ बजेसम्म सञ्चालन हुँदै आएका थिए।
नेपाल राजपत्रमा प्रकाशित सूचनाअनुसार यस अवधिमा साताको पाँच दिन कार्यालय बिहान ९ देखि अपराह्न ४ बजेसम्म सञ्चालन हुनेछन्।
यसअघि सरकारले पेट्रोलियम पदार्थको आपूर्तिमा देखिएको समस्यालाई मध्यनजर गर्दै शनिबार र आइतबार सार्वजनिक बिदा दिने निर्णय गरेको थियो। उक्त व्यवस्था पनि निरन्तर रहनेछ।
