काठमाडौं, १६ कात्तिक । इलाममा २५औँ सत्याग्रहमा रहेका चिकित्सा शिक्षा सुधार अभियन्ता डा. गोविन्द केसीको स्वास्थ्य अवस्था जटिल बनेपछि उनलाई हेलिकोप्टर मार्फत काठमाडौं ल्याउने तयारी गरिएको छ।
गत बिहीबारदेखि आमरण अनशनमा रहेका केसीलाई स्वास्थ्यमा समस्या देखिएपछि शनिबार साँझ इलाम अस्पताल भर्ना गरिएको थियो। उनको श्वासप्रश्वासमा कठिनाइ हुनुका साथै रक्तचाप र नाडीको गति असामान्य भएपछि थप उपचारका लागि काठमाडौं लैजान चिकित्सकले सुझाव दिएका हुन्।
उनका सहयोगी पवन थापाका अनुसार स्वास्थ्य मन्त्रालय र जिल्ला प्रशासन कार्यालयको समन्वयमा हेलिकोप्टरबाट काठमाडौं ल्याउने तयारी भइरहेको छ।
चिकित्सा शिक्षा सुधार, सरकारी मेडिकल कलेज विस्तार र विगतका सहमति कार्यान्वयनको माग राख्दै डा. केसी अनशनमा बसेका हुन्।
