जनकपुर, १४ कात्तिक । बाराको फेटा गाउँपालिका–३ मा अस्पताल उद्घाटनको विषयलाई लिएर भएको विवादले उग्र रूप लिँदा झडप भएको छ । घटनामा १६–१७ वर्षीय आदित्य पासवान गम्भीर घाइते भएका छन् ।
अस्पतालमा आवश्यक पूर्वाधार, जनशक्ति र सेवा–सुविधा नपुगेको भन्दै स्थानीयले उद्घाटन कार्यक्रमको विरोध गरेका थिए । विरोधका क्रममा दुई पक्षबीच तनाव बढेपछि झडप भएको हो ।
प्रदर्शनका क्रममा गोली चलेको र प्रहरीले लाठीचार्ज गरेको स्थानीयले बताएका छन् । प्रमुख जिल्ला अधिकारी खडानन्द अधिकारीका अनुसार घाइते पासवानको वीरगन्ज हेल्थ केयरमा उपचार भइरहेको छ ।
रास्वपा सांसद समीक्षा बास्कोटा प्रमुख अतिथि रहने भनिएको उद्घाटन कार्यक्रम विवादका कारण रोकिएको छ । झडपपछि करिब एक दर्जन सवारीसाधनमा आगजनी भएको र अवस्था नियन्त्रणमा लिन थप सुरक्षाकर्मी परिचालन गर्ने तयारी भइरहेको प्रशासनले जनाएको छ ।
