पोखरा, १० कात्तिक । प्रतिनिधिसभाका सभामुख डोलप्रसाद अर्यालले निजी क्षेत्रको विकासबिना मुलुकको आर्थिक समृद्धि सम्भव नहुने बताएका छन्। पोखराका पर्यटन व्यवसायीसँगको भेटमा उनले पर्यटन क्षेत्रलाई रोजगारी सिर्जना र आर्थिक विकासको प्रमुख आधारका रूपमा अघि बढाउनुपर्ने बताए।
सभामुख अर्यालले पर्यटनसम्बन्धी कानुन निर्माण गर्दा व्यवसायी तथा सरोकारवालाको सुझाव समेटिने उल्लेख गर्दै पर्यटन विधेयकलाई आवश्यकताअनुसार परिमार्जन गर्न सकिने बताए।
भेटका क्रममा पोखरा पर्यटन परिषद्ले दिगो पर्यटन विकासका लागि १० बुँदे मागसहित ध्यानाकर्षणपत्र बुझाएको थियो। मागमा पोखरा–दुबई उडानलाई दिगो बनाउने, नेपाल वायुसेवा निगमबाट पोखराबाट अन्तर्राष्ट्रिय उडान सञ्चालन गर्न पहल गर्ने, विमानस्थलबाटै श्रम स्वीकृति तथा भिसासम्बन्धी सेवा उपलब्ध गराउने र रत्नमन्दिरलाई संग्रहालयका रूपमा विकास गर्नेलगायत विषय समेटिएका छन्।
त्यस्तै, फेवातालको जलाधार क्षेत्र संरक्षण र लेकसाइडका होटल तथा व्यावसायिक भवनको करमा सहुलियत दिन पनि माग गरिएको छ। सभामुख अर्यालले व्यवसायीका जायज माग सम्बोधनका लागि सम्बन्धित मन्त्रालयसँग समन्वय गर्ने प्रतिबद्धता जनाएका छन्।
