काठमाडौ,६ असोज । भोटेकोशी बाढीबाट प्रभावित रसुवा, नुवाकोट र धादिङका परिवारलाई पुनःस्थापना गर्न २७७ कित्ता जग्गा पहिचान गरिएको छ ।
भूमि व्यवस्था, सहकारी तथा गरिबी निवारण मन्त्रालयअन्तर्गत गठित समितिले अध्ययन गरी ३ हजार २७९ रोपनीभन्दा बढी क्षेत्रफलको जग्गा पुन : स्थापनाका लागि सिफारिस गरेको हो ।
पहिचान गरिएका जग्गामध्ये रसुवामा १७७, नुवाकोटमा ९४ र धादिङमा ६ कित्ता छन् । क्षेत्रफलका हिसाबले नुवाकोटमा सबैभन्दा धेरै २ हजार ६६५ रोपनीभन्दा बढी जग्गा पहिचान भएको छ ।
समितिले सुरक्षित स्थानलाई प्राथमिकता दिँदै सडक, खानेपानी, विद्युत्, विद्यालय, स्वास्थ्यलगायत पूर्वाधारसहित एकीकृत बस्ती विकास गर्न सुझाव दिएको छ । अन्तिम निर्णयअघि जग्गाको प्राविधिक, वातावरणीय तथा सामाजिक अध्ययन गर्नुपर्ने प्रतिवेदनमा उल्लेख छ ।
