काठमाडौं, ५ असोज । नेकपा एमालेको केन्द्रीय कमिटी बैठक आजदेखि ललितपुरको रामबाग मलमा सुरु हुँदैछ। तीन दिनसम्म चल्ने बैठकमा पार्टीभित्र देखिएको पछिल्लो विवाद तथा सांगठनिक विषयमा छलफल हुने बताइएको छ।
पार्टी नेतृत्व परिवर्तनको बहस चर्किरहेका बेला एमालेले केन्द्रीय कमिटी बैठक बोलाएको हो। बैठकमा राष्ट्रिय महाधिवेशन प्रतिनिधि परिषद्को बैठक आयोजना गर्ने विषयमा पनि छलफल हुने भएको छ।
आइतबार बसेको पार्टी सचिवालय बैठकले राष्ट्रिय महाधिवेशन प्रतिनिधि परिषद्को बैठक बोलाउने प्रस्ताव केन्द्रीय कमिटीमा पेस गर्ने निर्णय गरेको थियो। परिषद् बैठक बोलाउने सम्बन्धमा अन्तिम निर्णय केन्द्रीय कमिटीले गर्नेछ।
