काठमाडौं, १४ भदौ । ८७ वर्षीया व्यवसायी राजी राणाले प्रधानमन्त्री दैवी प्रकोप उद्धार कोषमा १ करोड ९ लाख रुपैयाँ सहयोग गरेकी छन् ।
व्यक्तिगततर्फबाट प्राप्त सहयोगमध्ये यो ठूलो रकममध्ये एक रहेको जनाइएको छ । राणाले सहयोगी कृष्ण बस्नेतमार्फत पठाएको चेक अर्थमन्त्री डा. स्वर्णिम वाग्लेलाई हस्तान्तरण गरिएको हो ।
राणाको कार्यालयमा कार्यरत कर्मचारीहरूले पनि थप ८० हजार रुपैयाँ सहयोग गरेका छन् । राणाले बाढीपहिरो प्रभावितका लागि २५ लाख रुपैयाँ बराबरको खाद्यान्न तथा जिन्सी सामग्री समेत उपलब्ध गराउने प्रतिबद्धता जनाएकी छन् ।
अर्थ र गृह मन्त्रालयसँग समन्वय गरी आवश्यक स्थानमा उक्त सामग्री पठाइने बताइएको छ । यसैबीच, प्रधानमन्त्री दैवी प्रकोप उद्धार कोषमा पछिल्लो ३६ घण्टामा १ अर्ब ९१ करोड ८६ लाख ५० हजार ९११ रुपैयाँ सहयोग संकलन भएको अर्थ मन्त्रालयले जनाएको छ ।
विभिन्न १० वाणिज्य बैंकमा रहेका खातामार्फत उक्त रकम जम्मा भएको हो ।
