महोत्तरी, १६ जेष्ठ । मधेश प्रदेश सरकारका गृह, सञ्चार तथा कानुन मन्त्री फकिरा महतोले महोत्तरीको गौशाला नगरपालिका–३ स्थित श्री निगौल गाई गौशाला व्यवस्थापन कार्यालयको अनुगमन तथा निरीक्षण गरेका छन् ।
अनुगमनका क्रममा मन्त्री महतोले गौशालाको व्यवस्थापन अवस्था, गाईहरूको संरक्षण, उपलब्ध सेवा–सुविधा तथा सञ्चालन प्रक्रियाबारे जानकारी लिएका थिए ।
उनले गौ संरक्षणसँगै गौशालाको दिगो व्यवस्थापन, सरसफाइ र आवश्यक पूर्वाधार विकासमा सम्बन्धित निकायले विशेष ध्यान दिनुपर्ने बताएका छन् । 
निरीक्षण कार्यक्रममा नगर प्रमुख डा.दिपेन्द्र महतो शहित सहित स्थानीय जनप्रतिनिधि, राजनीतिक दलका नेता, समाजसेवी तथा बुद्धिजीवीहरूको उपस्थिति रहेको थियो ।
सहभागीहरूले गौशालाको वर्तमान अवस्था, चुनौती तथा सुधारका सम्भावित उपायबारे मन्त्रीसमक्ष आफ्ना धारणा राखेका थिए । मन्त्री महतोले गौशालाको प्रभावकारी सञ्चालनका लागि प्रदेश सरकार आवश्यक सहयोग र समन्वय गर्न सकारात्मक रहेको बताउँदै स्थानीय तह, सरोकारवाला निकाय तथा समुदायबीच सहकार्य आवश्यक रहेको उल्लेख गरे । 
अनुगमनले गौ संरक्षण तथा व्यवस्थापनसम्बन्धी विषयलाई थप प्रभावकारी बनाउन सहयोग पुग्ने विश्वास व्यक्त गरिएको छ ।
