काठमाडौं, १४ जेठ । सहकारी क्षेत्रको संकटमा सरकारी संयन्त्रकै कमजोरी मुख्य कारण रहेको जाँचबुझ आयोगले ठहर गरेका छन् ।
आयोगका अनुसार सहकारीलाई मनपरी कार्यक्षेत्र विस्तार गर्न अनुमति दिँदा समस्या झन् गम्भीर बनेको हो । प्रतिवेदनमा नियमन र सुपरीवेक्षणको अभाव, कानुनी अस्पष्टता तथा गैरजिम्मेवार सरकारी भूमिका कारण सहकारी क्षेत्र संकटमा परेको उल्लेख छ ।
विभागले सहकारीलाई देशभर कार्यक्षेत्र विस्तार र शाखा खोल्न सहज अनुमति दिएको आयोगको निष्कर्ष छ । आयोगले बैंकभन्दा ठूलो आकारमा पुगेका सहकारीहरूले बचतकर्ताको रकम जोखिमपूर्ण रूपमा परिचालन गरेको, आफ्नै कम्पनीमा लगानी गरेको र आर्थिक अनुशासन पालना नगरेको जनाएको छ ।
साथै, बचत सुरक्षाको बीमा व्यवस्था नहुनु र अस्वाभाविक ब्याजदर दिने सहकारीमाथि प्रभावकारी निगरानी नहुनुले समस्या बढाएको प्रतिवेदनमा उल्लेख छ ।
