काठमाडौं, १ जैष्ठ । सरकारले राष्ट्रिय अनुसन्धान विभागलाई पुनः प्रधानमन्त्री तथा मन्त्रिपरिषद् कार्यालय मातहत ल्याएको छ ।
बुधबार कार्यविभाजन नियमावली संशोधन गर्दै विभागलाई प्रधानमन्त्री कार्यालयअन्तर्गत राख्ने निर्णय गरिएको हो । यसअघि विभिन्न सरकारका पालामा राष्ट्रिय अनुसन्धान विभागको संरचना परिवर्तन हुँदै आएको थियो ।
पूर्वप्रधानमन्त्री केपी शर्मा ओली नेतृत्वको सरकारले विभागलाई प्रधानमन्त्री कार्यालय मातहत राखेको थियो भने पछि गठन भएको सरकारले त्यसलाई गृह मन्त्रालय मातहत फर्काएको थियो । हाल प्रधानमन्त्री बालेन शाह नेतृत्वको सरकारले विभागलाई फेरि प्रधानमन्त्री कार्यालयअन्तर्गत ल्याउने निर्णय गरेको हो ।
सरकारद्वारा १५ चैतमा सार्वजनिक गरिएको ‘सुशासन मार्गचित्र २०८२’ मा पनि गुप्तचरी निकायलाई प्रधानमन्त्री कार्यालय मातहत राख्न सुझाव दिइएको थियो ।
प्रधानमन्त्री तथा मन्त्रिपरिषद् कार्यालयका सचिव गोविन्दबहादुर कार्कीको संयोजकत्वमा तयार गरिएको उक्त मार्गचित्रमा विभागलाई पटक–पटक मन्त्रालय परिवर्तन नगरी प्रधानमन्त्री कार्यालयअन्तर्गत राखेर संस्थागत स्थायित्व दिनुपर्ने उल्लेख गरिएको छ ।
साथै यो व्यवस्था तीन महिनाभित्र कार्यान्वयन गर्न सुझाव दिइएको थियो । सरकारीका अनुसार सोही सुझावअनुसार अहिले राष्ट्रिय अनुसन्धान विभागलाई प्रधानमन्त्री कार्यालय मातहत ल्याउने निर्णय कार्यान्वयन गरिएको हो ।
