काठमाडौं, ३० वैशाख । प्रतिनिधिसभाको दोस्रो बैठक पनि विपक्षी दलको अवरोधका कारण स्थगित भएको छ ।
प्रमुख प्रतिपक्षी नेपाली कांग्रेसले प्रधानमन्त्रीको उपस्थितिसहित जवाफको माग गर्दै सदन अवरुद्ध गरेको हो । विपक्षीको विरोध जारी रहेपछि सभामुखले बैठक १५ मिनेटका लागि स्थगित गरेको हो ।
यसअघि बसेको पहिलो बैठक पनि यही विषयमा भएको अवरोधका कारण केही समयका लागि रोकिएको थियो । आजको बैठकमा आर्थिक वर्ष ०८३÷०८४ को नीति तथा कार्यक्रम प्रस्तुत गर्ने कार्यसूची रहेको थियो । प्रधानमन्त्री बालेन शाहको तर्फबाट अर्थमन्त्री डा. स्वर्णिम वाग्लेले प्रस्ताव पेश गर्ने तयारी भएपछि विपक्षी सांसदहरूले विरोध सुरु गरेका थिए ।
सभामुख डीपी अर्यालले प्रतिपक्षी दलका प्रमुख सचेतकहरूसँग छलफल गरेपछि बैठक पुनः सञ्चालन गरिएको थियो । त्यसक्रममा अर्थमन्त्री वाग्लेले नीति तथा कार्यक्रममाथिको छलफल प्रस्ताव पेश गरे पनि कांग्रेस सांसदहरूले पुनः विरोध जनाए ।
कांग्रेस संसदीय दलका नेता भीष्मराज आङ्देम्बेले प्रधानमन्त्रीलाई सदनमा उपस्थित गराई जवाफ दिन रुलिङ गर्न माग गरे । तर सभामुखले तत्काल रुलिङ नगर्ने बताउँदै प्रधानमन्त्रीसँग छलफल तय भइसकेकाले संवादपछि मात्रै आगामी कार्यसूचीबारे विपक्षीसँग परामर्श गर्ने जानकारी दिए ।
