काठमाडौं, १३ चैत । नवनियुक्त स्वास्थ्य तथा जनसंख्या मन्त्री निशा मेहताले स्वास्थ्य क्षेत्रमा सुधारका लागि दीर्घकालीन योजना अघि बढाउने संकेत दिएकी छिन् ।
पदभार सम्हाल्दै उनले सबै नागरिकलाई सहज रूपमा उपचार सेवा उपलब्ध गराउनु आफ्नो मुख्य प्राथमिकता भएको जनाए । उनले उपचार नपाएर कसैले ज्यान गुमाउन नपरोस् भन्ने लक्ष्यसहित काम गर्ने उल्लेख गरिन् ।
मन्त्री मेहताले स्वास्थ्यकर्मीको विदेश पलायन ठूलो चुनौती बनेको भन्दै डाक्टर, नर्स र अन्य जनशक्तिलाई देशमै टिकाइराख्न प्रोत्साहन गर्ने वातावरण आवश्यक रहेको बताइन् ।
उनीहरूको पारिश्रमिक, कामको सन्तुष्टि र अवसर अभावका कारण समस्या देखिएको उनको भनाइ छ । उनले रोग लागेपछि उपचारभन्दा पनि रोकथाममा ध्यान दिनुपर्नेमा जोड दिँदै नसर्ने रोग नियन्त्रणलाई प्राथमिकतामा राख्ने बताइन् ।
साथै, अस्पतालहरूमा उपकरण खरिदसँगै मर्मत–सम्भारका लागि पनि पर्याप्त बजेट सुनिश्चित गर्नुपर्ने आवश्यकता औंल्याइन् । स्वास्थ्य क्षेत्र जटिल भएकाले तत्काल निर्णय नगरी पहिले समस्या र आवश्यकताहरू अध्ययन गरेर मात्रै नीति निर्माण गर्ने उनको योजना रहेको छ ।
