काठमाडौँ, १७ माघ । निर्वाचन आयोगले प्रतिनिधिसभा निर्वाचनलाई स्वच्छ, निष्पक्ष र विश्वसनीय बनाउन निर्वाचन आचारसंहिता, २०८२ कडाइका साथ कार्यान्वयन गरिरहेको जनाएको छ ।
आचारसंहिता उल्लङ्घनसम्बन्धी उजुरी र सूचनाका आधारमा आयोगले हालसम्म राजनीतिक दल, उम्मेदवार र संस्थासहित २१ जनासँग स्पष्टीकरण सोधेको छ ।
तीमध्ये पाँच जनाबाट मात्र जवाफ प्राप्त भएको र बाँकीको ताकेता भइरहेको आयोगले जनाएको छ । आयोगका अनुसार मिथ्या, भ्रमपूर्ण तथा घृणास्पद अभिव्यक्तिको निगरानी गर्दै गैरकानुनी गतिविधिमा संलग्न व्यक्ति वा संस्थालाई नियामक निकायसँगको सहकार्यमा कानुनी दायरामा ल्याउने काम भइरहेको छ ।
यसैबीच निर्वाचन सूचना सम्प्रेषण तथा समन्वय केन्द्र अन्तर्गतको सूचना सदाचार प्रवद्र्धन इकाइले पहिचान गरेका ३०२ हानिकारक सूचना कानुनी कारबाहीका लागि सम्बन्धित निकायमा पठाइएको आयोगका प्रवक्ता नारायणप्रसाद भट्टराईले जानकारी दिए ।
