जनकपुर, १६ माघ । नेपाली कांग्रेसका सभापति गगन थापाले पार्टीभित्र अब कुनै गुट नरहेको स्पष्ट गर्दै कांग्रेस नयाँ सोच र नयाँ कार्यशैलीका साथ अघि बढेको बताएका छन् ।
धनुषा-१ मा आयोजित कार्यकर्ता भेटघाट कार्यक्रममा बोल्दै उनले कांग्रेसभित्र एकता मजबुत भएको र सबै नेता–कार्यकर्ता एउटै लक्ष्यका लागि केन्द्रित भएको जिकिर गरे ।
थापाले पार्टीका उम्मेदवारहरूलाई एकढिक्का भएर जिताउन आग्रह गर्दै नेतृत्वमा रहेका व्यक्तिहरूले व्यक्तिगत धारणा र असहमति चुनावपछि छलफल गर्न सकिने बताए । चुनावी समयमा पार्टीको निर्णय र उम्मेदवार नै सर्वोपरि हुने उनको भनाइ थियो ।
उनले मधेसले कांग्रेसमाथि पूर्ण विश्वास गरेर एकमना सरकार बनाउने विश्वास व्यक्त गर्दै कांग्रेस हिजोको पार्टी नभई नयाँ सोचसहित आएको दाबी गरे ।
‘अब पार्टीभित्र गुट छैन, रहँदैन पनि,’ उनले भने, ‘उम्मेदवार आइसकेपछि व्यक्तिगत सोच गौण हुन्छ, पार्टीको निर्णय नै अन्तिम हुन्छ । कांग्रेस ध्वंस गर्ने वा उत्तेजना फैलाउने शक्ति नभई देश सम्हाल्ने, मिलाउने र सुधार्ने शक्ति भएको थापाको भनाइ छ ।
उनले जानकी माताको भूमिबाट कांग्रेसको सन्देश घर–घरमा पु¥याउन कार्यकर्तालाई आग्रह गरे । थापाले कांग्रेसले देशलाई जोड्ने राजनीति गर्ने उल्लेख गर्दै स्थायित्व, सुधार र सहकार्यका माध्यमबाट मुलुकलाई सही दिशामा अघि बढाउने प्रतिबद्धता व्यक्त गरे ।
