काठमाडौं, १६ माघ । ललितपुरको गोदावरी नगरपालिका-७ देवीचौरमा श्रीमतीको हत्या गरेर श्रीमान् आफैं प्रहरी कार्यालयमा पुगेर आत्मसमर्पण गरेका छन् ।
आत्मसमर्पण गर्ने व्यक्ति सोही स्थानका ३० वर्षीय विनादे पाख्रिन हुन् । जिल्ला प्रहरी परिसर ललितपुरका अनुसार पाख्रिनले आफ्नी २३ वर्षीया श्रीमती कोपिला पाख्रिनको हत्या गरेका हुन् ।
घटनापछि उनी टिकाभैरव प्रहरी चौकीमा पुगेर “मैले श्रीमतीको हत्या गरेँ” भन्दै आत्मसमर्पण गरेका थिए । प्रहरीका अनुसार श्रीमान्–श्रीमती दुवैले मदिरा सेवन गरेका थिए ।
मदिरा सेवनपछि घरायसी विवाद चर्किँदा विनादे पाख्रिनले चिर्पटले हानेर श्रीमतीको हत्या गरेको प्रारम्भिक अनुसन्धानबाट खुलेको छ ।
कुटपिटपछि खाटमा सुताएको अवस्थामा कोपिलाको शव फेला परेको प्रहरीले जनाएको छ । घटना शुक्रबार बिहान भएको बताइएको छ ।
घटनाको जानकारी पाएलगत्तै प्रहरी टोली घटनास्थलमा पुगेर शवलाई पोस्टमार्टमका लागि पठाएको छ । आरोपी विनादे पाख्रिनलाई नियन्त्रणमा लिएर थप अनुसन्धान भइरहेको जिल्ला प्रहरी परिसर ललितपुरका एसपी गौतम मिश्रले जानकारी दिए ।
