जनकपुर, १० माघ । केही दिनअघि पूर्वप्रधानमन्त्री केपी शर्मा ओलीले एक भिडियो बोल्दै “यो दमक हो, धनुषा र महोत्तरीजस्तो फोहोर छैन” भन्दै मधेशलाई लक्षित कटाक्ष गरेका थिए ।
ओलीको उक्त अभिव्यक्तिपछि मधेश प्रदेशमा राजनीतिक तथा सामाजिक तहमा व्यापक प्रतिक्रिया आएको छ । यही सन्दर्भमा हाम्रो टिमले मधेश प्रदेश सरकारको मुख्य प्रशासनिक केन्द्र मधेश भवनको अवलोकन गरेको छ ।
मधेश सरकारका मन्त्रीहरू बस्ने मन्त्री निवास क्षेत्रको मुख्य प्रवेशद्वार अगाडि फोहोर थुप्रिएको अवस्थामा भेटियो । सडकछेउ प्लास्टिक, कागजका फोहोरसँगै विभिन्न ब्रान्डका रक्सीका बोतलहरू समेत देखिन्थे ।
सार्वजनिक पदमा रहेका व्यक्तिहरू बसोबास गर्ने स्थानकै अगाडि यति ठूलो मात्रामा फोहोर देखिनुले प्रदेश सरकारको सरसफाइ व्यवस्थामाथि गम्भीर प्रश्न उठाएको छ ।
पूर्वप्रधानमन्त्री ओलीले एकातर्फ मधेशलाई फोहोरसँग तुलना गरेर कटाक्ष गरिँदै आएको छ भने अर्कोतर्फ मधेश सरकारकै जिम्मेवार निकाय वरिपरि फोहोरको अवस्था देखिनु आफैंमा विरोधाभासपूर्ण चित्र हो ।
यसले नेतृत्वको भनाइ र व्यवहारबीचको दूरी उजागर गरेको स्थानीयको भनाइ छ ।
