जनकपुर, ६ माघ । नेकपा एमालेका वरिष्ठ नेता रघुवीर महासेठले धनुषा क्षेत्र नम्बर ४ बाट प्रतिनिधिसभा सदस्यका लागि आफ्नो उम्मेदवारी दर्ता गराएका छन् ।
आगामी २१ फागुनमा हुने प्रतिनिधिसभा निर्वाचनका लागि महासेठले मंगलबार निर्वाचन अधिकृतको कार्यालय पुगेर औपचारिक रूपमा मनोनयन दर्ता गराएका हुन् ।
मनोनयन दर्ताका क्रममा महासेठसँगै एमालेका नेता–कार्यकर्ता तथा समर्थकहरूको उल्लेख्य उपस्थिति रहेको थियो । उम्मेदवारी दर्तापछि संक्षिप्त प्रतिक्रिया दिँदै महासेठले धनुषा–४ का जनताको विश्वास र समर्थनका आधारमा फेरि एकपटक चुनावी प्रतिस्पर्धामा उत्रिएको बताएका छन् ।
उनले अघिल्ला कार्यकालमा सुरु गरेका विकासका कामलाई निरन्तरता दिने प्रतिबद्धता पनि व्यक्त गरे । महासेठ यस क्षेत्रबाट लगातार दुई पटक प्रतिनिधिसभा सदस्यमा निर्वाचित भइसकेका अनुभवी नेता हुन् ।
