काठमाडौं, ६ माघ । प्रतिनिधिसभा सदस्य निर्वाचनका लागि मंगलबार दिउँसो ३ बजेसम्म देशभर १ हजार १ सय ९५ जनाले उम्मेदवारी मनोनयन दर्ता गराएका छन् ।
निर्वाचन आयोगका प्रवक्ता नारायणप्रसाद भट्टराईका अनुसार मुख्य निर्वाचन अधिकृत तथा निर्वाचन अधिकृतको कार्यालयमार्फत यो संख्या पुगेको हो ।
आयोगका अनुसार उम्मेदवारी दर्ता प्रक्रिया उत्साहजनक र शान्तिपूर्ण रूपमा भइरहेको छ । उम्मेदवारी दर्ताको समय बिहान १० बजेदेखि साँझ ५ बजेसम्म तोकिएको छ ।
तर, साँझ ५ बजेसम्म कार्यालय परिसरमा प्रवेश गरी लाइनमा बसेकालाई भने समय जति लागे पनि मनोनयन दर्ता गर्न दिइने आयोगले स्पष्ट पारेको छ ।
फागुन २१ गते प्रतिनिधिसभाका १६५ निर्वाचन क्षेत्रमा निर्वाचन हुँदैछ । उम्मेदवारी दर्तासँगै देशभर चुनावी माहोल थप तातेको देखिएको छ ।
