जनकपुर, ४ माघ । राष्ट्रिय स्वतन्त्र पार्टी (रास्वपा) का वरिष्ठ नेता बालेन शाह जनकपुर आइपुगेका छन् ।
काठमाडौँ महानगरपालिकाको मेयर पदबाट आइतबार औपचारिक रूपमा राजीनामा दिएपछि उनी पार्टीका शीर्ष नेताहरूसँग जनकपुर आएका हुन् ।
बालेन शाह रास्वपा सभापति रवि लामिछानेसहित अन्य पार्टी नेतासँग काठमाडौँको घण्टीघर हुँदै हवाई मार्गबाट जनकपुर पुगेका थिए । उनको आगमनको खबर पाएसँगै जनकपुर विमानस्थलमा रास्वपाका नेता, कार्यकर्ता तथा समर्थकहरूको उल्लेख्य भिड जम्मा भएको थियो ।
सुरक्षाकर्मीहरूले अवस्था नियन्त्रणमा लिन प्रयास गरे पनि समर्थकहरूको उत्साहका कारण केही समय तनावपूर्ण स्थिति बनेको थियो ।
राजीनामापछि बालेन शाहको यो पहिलो सार्वजनिक राजनीतिक यात्रा भएकाले समर्थकहरूमा विशेष उत्साह देखिएको बताइएको छ ।
जनकपुर भ्रमणका क्रममा बालेन शाहले पार्टी कार्यकर्ता तथा स्थानीय नेतासँग भेटघाट गर्ने कार्यक्रम रहेको र आगामी राजनीतिक गतिविधिबारे छलफल हुने रास्वपाले जनाएको छ ।
