काठमाडौँ, ३ माघ। नेपाली कांग्रेसले आगामी फागुन २१ गते हुने प्रतिनिधिसभा निर्वाचनका लागि उम्मेदवार चयन तथा टिकट वितरणको जिम्मेवारी सम्हाल्ने गरी संसदीय बोर्ड गठन गरेको छ।
नयाँ बानेश्वरमा आज बसेको केन्द्रीय कार्यसमितिको बैठकले सभापति गगनकुमार थापाको संयोजकत्वमा १३ सदस्यीय संसदीय बोर्ड गठन गर्ने निर्णय गरेको हो।
बोर्डमा पार्टीका उपसभापति, महामन्त्री, सहमहामन्त्रीलगायत केन्द्रीय तहका पदाधिकारी तथा सदस्यहरू रहनेछन्। संसदीय बोर्डले प्रत्यक्ष निर्वाचन प्रणालीतर्फका उम्मेदवार छनोट, सिफारिस र अन्तिम निर्णयमा मुख्य भूमिका खेल्नेछ।
बैठकले पार्टीका सम्पूर्ण संरचनालाई निर्वाचन केन्द्रित बनाउने निर्णयसमेत गरेको छ। पार्टी प्रवक्ता देवराज चालिसले कांग्रेस अब संगठन सुदृढीकरण, उम्मेदवार छनोट र चुनावी तयारीमा केन्द्रित हुने बताए।
विशेष महाधिवेशनबाट निर्वाचित गगन थापा नेतृत्वको कार्यसमितिलाई शुक्रबार निर्वाचन आयोगले आधिकारिक मान्यता दिएसँगै कांग्रेसले निर्वाचन प्रक्रियालाई तीव्रता दिएको हो। संसदीय बोर्ड गठनसँगै कांग्रेसको उम्मेदवार छनोट प्रक्रिया औपचारिक रूपमा सुरु भएको छ।
