काठमाडौं, १ माघ । नेपाली कांग्रेसले विशेष महाधिवेशनबाट सभापतिमा चयन भएका गगनकुमार थापाको नाम र तस्बिर पार्टीको आधिकारिक वेबसाइटबाट हटाएको छ ।
कांग्रेसले १४औँ महाधिवेशनबाट महामन्त्री निर्वाचित थापाको विवरण बिहीबार बिहान वेबसाइटबाट हटाएको हो ।
थापासँगै तत्कालीन महामन्त्री विश्वप्रकाश शर्मा र सहमहामन्त्री फरमुल्ला मन्सुरको नाम पनि पार्टीको वेबसाइटमा राखिएको नेतृत्व सूचीबाट हटाइएको छ ।
शर्मा र मन्सुर भृकुटीमण्डपमा सम्पन्न कांग्रेसको दोस्रो विशेष महाधिवेशनबाट क्रमशः उपसभापति र सहमहामन्त्री पदमा सर्वसम्मत चयन भएका थिए ।
यसअघि बुधबार बसेको नेपाली कांग्रेस केन्द्रीय कार्यसमिति बैठकले गगन थापा, विश्वप्रकाश शर्मा र फरमुल्ला मन्सुरलाई पाँच वर्षका लागि पार्टीको साधारण सदस्यसमेत नरहने गरी निस्कासन गर्ने निर्णय गरेको थियो ।
सो निर्णयपछि उनीहरूका नाम र तस्बिर पार्टीको आधिकारिक संरचना तथा वेबसाइटबाट हटाइएको बताइएको छ ।
