काठमाडौं, १ माघ । अमेरिकाले नेपालसहित ७५ देशका नागरिकका लागि आप्रवासी भिसा प्रक्रिया स्थगित गर्ने घोषणा गरेको छ ।
अमेरिकी विदेश मन्त्रालयले जनवरी २१ देखि लागू हुने गरी आप्रवासी भिसा आवेदनहरू रोक्न कन्सुलर अधिकारीहरूलाई निर्देशन दिएको हो ।
ट्रम्प प्रशासनले ती देशका नागरिकहरू अमेरिकामा गएपछि सार्वजनिक सहायतामा निर्भर हुन सक्ने सम्भावनालाई आधार मानेर यो निर्णय लिएको जनाएको छ ।
यो कदम यसअघि लगाइएका अध्यागमन तथा यात्रा प्रतिबन्धको निरन्तरता हो । यो स्थगन गैर–आप्रवासी भिसा (पर्यटक र व्यापारिक) मा भने लागू हुने छैन, तर ती भिसाका आवेदकहरूमाथि पनि आर्थिक अवस्था र सार्वजनिक सहायता उपयोगसम्बन्धी कडा जाँच गरिनेछ ।
