जय कुंवर । जनकपुर, ३० पुस । फाल्गुण २१ गते हुन लागेको प्रतिनिधिसभा सदस्य निर्वाचनलाई लक्षित गर्दै प्रदेशस्तरीय सुरक्षा गोष्ठी जनकपुरमा सम्पन्न भएको छ।
निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउने उद्देश्यले गोष्ठी आयोजना गरिएको थियो। गोष्ठीमा गृहमन्त्रीसहित प्रदेशका विभिन्न सुरक्षा निकायका प्रमुखहरू तथा मुख्यमन्त्री कृष्णप्रसाद यादवको उपस्थिति रहेको थियो।
कार्यक्रममा निर्वाचनको समग्र सुरक्षा व्यवस्थापन, सुरक्षा निकायबीचको समन्वय, सम्भावित चुनौती तथा तिनको समाधानका उपायबारे विस्तृत छलफल गरिएको थियो।
गृह मन्त्रालयका प्रवक्ताका अनुसार निर्वाचन अवधिभर शान्ति–सुरक्षा कायम राख्न आवश्यक रणनीति तय गर्नुका साथै सुरक्षा संयन्त्रलाई थप सक्रिय र प्रभावकारी बनाउने विषयमा सहमति भएको छ।
गोष्ठीमा संवेदनशील क्षेत्र पहिचान, मतदानस्थलको सुरक्षा, आकस्मिक प्रतिक्रिया प्रणाली र मतगणनाको सुरक्षा व्यवस्थाबारे समेत समीक्षा गरिएको प्रवक्ताले जानकारी दिए।
सरकारले आगामी निर्वाचनलाई सफल बनाउन सुरक्षा निकायलाई उच्च सतर्कताका साथ परिचालन गर्ने तयारी गरेको पनि गोष्ठीमा उल्लेख गरिएको छ।
