काठमाडौं, ३० पुस । नेपाली कांग्रेसभित्रको आन्तरिक विवाद चरम सीमामा पुगेसँगै पार्टीमा औपचारिक फुट देखिएको छ ।
नेपाली कांग्रेसको केन्द्रीय कार्यसमिति बैठकले महामन्त्रीद्वय गगन थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई पाँच वर्षका लागि पार्टीको साधारण सदस्यसमेत नरहने गरी निष्कासन गर्ने निर्णय गरेको छ ।
भृकुटीमण्डपमा छुट्टै नेतृत्व चयन र विशेष महाधिवेशनको तयारी चलिरहेका बेला सानेपास्थित पार्टी केन्द्रीय कार्यालयमा बसेको केन्द्रीय कार्यसमिति बैठकले उक्त निर्णय गरेको हो ।
बैठकमा सहभागी एक नेताका अनुसार पार्टीको आधिकारिक निर्णयविपरीत विशेष महाधिवेशन आह्वान गरी समानान्तर गतिविधि गरेको आरोपमा उनीहरूलाई कडा कारबाही गरिएको हो । पार्टी नेतृत्वले अनुशासन उल्लंघन, संगठनात्मक अराजकता र केन्द्रीय निर्णयलाई चुनौती दिने गतिविधि बढ्दै गएको निष्कर्षसहित निष्कासनको निर्णय गरेको बताइएको छ ।
कांग्रेस नेतृत्वले यस्तो कदम पार्टीको एकता र विधानको रक्षा गर्न अपरिहार्य भएको दाबी गरेको छ । यद्यपि निष्कासित नेताहरू पक्षधर समूहले यो निर्णयलाई अलोकतान्त्रिक र प्रतिशोधपूर्ण भन्दै अस्वीकार गर्ने संकेत दिएका छन् । उनीहरूले पार्टीभित्र सुधार र नेतृत्व परिवर्तनको मागलाई दबाउन कारबाही गरिएको आरोप लगाएका छन् ।
कांग्रेसभित्र लामो समयदेखि चल्दै आएको नेतृत्व संघर्ष, विशेष महाधिवेशनको विवाद र समानान्तर गतिविधिका कारण पार्टी थप विभाजनतर्फ गएको विश्लेषकहरूको भनाइ छ ।
