काठमाडौं, २९ पुस । नेपाली कांग्रेसको विशेष महाधिवेशनका लागि गठन गरिएको निर्वाचन समितिले सभापतिसहित विभिन्न पदका उम्मेदवारका लागि फाराम वितरण प्रक्रिया सुरु गरेको छ ।
निर्वाचन समितिका अनुसार मंगलबार दिउँसो ३ः२५ बजेसम्म कुल ३० वटा उम्मेदवारी फाराम वितरण भइसकेको छ । वितरित फाराममध्ये ३ वटा सभापति पदका उम्मेदवारका लागि रहेको निर्वाचन समितिले जानकारी दिएको छ ।
अहिले फाराम वितरणको काम जारी रहेको र फाराम बुझ्ने प्रक्रिया साँझ ५ बजेपछि मात्रै सुरु हुने जनाइएको छ ।
कांग्रेसका करिब ५४ प्रतिशत महाधिवेशन प्रतिनिधिले माग गरेको विशेष महाधिवेशनलाई सभापति शेरबहादुर देउवासहितको संस्थापन समूहले बेवास्ता गरेपछि महामन्त्रीद्वय गगनकुमार थापा र विश्वप्रकाश शर्माले विशेष महाधिवेशन आह्वान गरेका हुन् ।
विशेष महाधिवेशन पक्षले निर्वाचन प्रक्रिया नै अघि बढाएपछि संस्थापन समूहले यसलाई रोक्ने प्रयासस्वरूप आन्तरिक छलफल सुरु गरेको छ ।
छलफलमा सभापति देउवा समूह, नेता शेखर कोइराला समूह र विशेष महाधिवेशन पक्षका नेताहरू सहभागी छन् । कांग्रेसभित्रको यो विवादले आगामी नेतृत्व चयन प्रक्रिया थप पेचिलो बन्दै गएको देखिन्छ ।
