जनकपुर, ६ पुस । बंगलादेशमा हिन्दू समुदायमाथि हिंसा र दमन भइरहेको आरोप लगाउँदै त्यसको विरोधमा आइतबार जनकपुरमा विरोध प्रदर्शन गरिएको छ ।
प्रदर्शनकारीहरूले बंगलादेशमा अल्पसंख्यक हिन्दू समुदायको सुरक्षा र न्याय सुनिश्चित गर्न अन्तर्राष्ट्रिय समुदायको ध्यानाकर्षण गराउनुपर्ने माग गरेका छन् । प्रदर्शनका क्रममा सहभागीहरूले बंगलादेशमा भइरहेको भनिएको हिंसाको कडा निन्दा गर्दै पीडित हिन्दू समुदायलाई न्याय दिनुपर्ने, दोषीमाथि कारबाही हुनुपर्ने तथा नेपाल सरकारले यस विषयमा कूटनीतिक पहल गर्नुपर्ने माग राखेका थिए ।
साथै केही समूहले नेपाललाई हिन्दू राष्ट्र घोषणा गर्नुपर्ने तथा सम्बन्धित राज्य निकायहरू खारेज गर्नुपर्ने मागसमेत अघि सारेका थिए । विरोध प्रदर्शन जानकी मन्दिरबाट सुरु भई जनक चोक, राम चोक, सोनरपट्टी हुँदै पुनः जनक चोक पुगेको थियो ।
जनक चोकमा प्रदर्शनकारीहरूले बंगलादेशमा कथित रूपमा हिंसा फैलाउने समूहको प्रतीकात्मक पुतला दहन गरी विरोध जनाएका थिए ।
त्यसपछि प्रदर्शन शिव चोक र भानु चोकसम्म पुगेर टायर बाल्दै सम्पन्न गरिएको थियो । प्रदर्शन शान्तिपूर्ण भए पनि नाराबाजी र प्रतीकात्मक गतिविधिका कारण केही समय जनकपुरका मुख्य सडकहरूमा आवागमन प्रभावित भएको थियो ।
सुरक्षाका लागि नेपाल प्रहरीले ठाउँ–ठाउँमा सुरक्षा व्यवस्था कडा बनाएको थियो ।
