जनकपुरधाम, ६ पुष । मधेश प्रदेश सरकारको मुख्यमन्त्री तथा मन्त्रिपरिषद्को कार्यालय मधेश भवनभित्रै रहेको गृह, सञ्चार तथा कानुन मन्त्रालयमा सारिएको छ ।
जेनजी आन्दोलनका क्रममा गत २३ भदौमा मुख्यमन्त्री कार्यालयमा आगजनी भएपछि अस्थायी रूपमा मधेश भवनभित्रको कबर्ड हलबाट कार्यालय सञ्चालन हुँदै आएको थियो ।
आगजनीपछि आवश्यक भौतिक पूर्वाधार, फर्निचर तथा कार्यकक्षको अभावका कारण कार्यालय सञ्चालनमा विभिन्न कठिनाइ देखिएको थियो ।
विशेषगरी मुख्यमन्त्रीका लागि छुट्टै कार्यकक्ष नहुँदा प्रशासनिक कामकाज प्रभावित हुँदै आएको थियो । यही अवस्थालाई मध्यनजर गर्दै मुख्यमन्त्री कृष्णप्रसाद यादवको निर्णयअनुसार मुख्यमन्त्री तथा मन्त्रिपरिषद्को कार्यालय गृह, सञ्चार तथा कानुन मन्त्रालय रहेको भवनमा सारिएको हो ।
यससँगै गृह, सञ्चार तथा कानुन मन्त्रालय भने अस्थायी रूपमा मुख्यमन्त्री कार्यालय सञ्चालन हुँदै आएको कबर्ड हलमा स्थानान्तरण गरिएको छ ।
प्रदेश सरकारका अनुसार कार्यालय स्थानान्तरणसँगै प्रशासनिक कामकाजलाई सहज र व्यवस्थित बनाउने लक्ष्य लिइएको छ भने आगजनी भएको पुरानो मुख्यमन्त्री कार्यालयको पुनर्निर्माण तथा व्यवस्थापनका विषयमा समेत आवश्यक तयारी भइरहेको छ ।
