काठमाडौं, ४ पुष । ललितपुरस्थित उच्च अदालत पाटनको परिसरमा एक युवतीले आत्महत्या प्रयास गरेकी छन् ।
करिब ३० वर्षीया ती युवतीले बिहीबार अदालत परिसरमै आत्महत्याको प्रयास गरेको प्रहरीले जनाए । घटनापछि प्रहरीले तत्काल उद्धार गरी उनलाई उपचारका लागि पाटन अस्पताल पठाएको थिए ।
कोष तथा लेखा नियन्त्रक कार्यालयका अधिकृत प्रमोद मैनाली प्रतिवादी रहेको मुद्दामा अदालतले धरौटीमा रिहा गर्न आदेश दिएपछि युवतीले आत्महत्या प्रयास गरेकी हुन् ।
उनले अदालत परिसरमै किटनाशक विषादी सेवन गरेको बताइएको छ । यसअघि काठमाडौं जिल्ला अदालतले पनि धरौटीमा रिहा गर्न आदेश दिएपछि ती युवती उच्च अदालत पाटन पुगेकी थिइन् ।
तर पाटनबाट समेत धरौटीमै रिहा गर्ने आदेश आएपछि उनले आत्महत्या प्रयास गरेको प्रहरीले बताए ।
