क्षितिज विश्वकर्मा
सर्लाही, २ पुस । सर्लाहीको बागमती नगरपालिकास्थित भरतताल (पर्यटकीय माछा पोखरी) क्षेत्रमा चौथोपटक बृहत् सोनाम ल्होछार मेला आयोजना हुने भएको छ ।
नेपाल तामाङ घेदुङ बागमती नगर कार्यसमितिले पत्रकार सम्मेलनमार्फत माघ ६ गते भरततालमा भव्य सांस्कृतिक कार्यक्रम आयोजना गरिने जानकारी दिएको हो ।
अहिले चलिरहेको ‘सा पुख्रि÷डुल ल्हो’ (सर्प वर्ग) लाई बिदाइ गर्दै आउँदो माघ ५ गते पर्ने २८६२ ‘ता ल्हो’ (घोडा वर्ग) लाई स्वागत गर्ने अवसरमा सोनाम ल्होछार विशेष कार्यक्रम आयोजना गर्न लागिएको घेदुङले जनाएको छ ।
माघ ५ गते तामाङ समुदायले आफ्नो घर–परिवार र समुदायस्तरमा ल्होछार मनाउने र त्यसको भोलिपल्ट माघ ६ गते मंगलबार भरततालमा बृहत् सांस्कृतिक मेला आयोजना गरिने घेदुङ नगर समितिका सचिव चन्द्रबहादुर जिम्बा तामाङले जानकारी दिनुभयो ।
बिहान १० बजेदेखि राति १० बजेसम्म सञ्चालन हुने कार्यक्रममा राष्ट्रियस्तरका चर्चित कलाकारहरूसँगै स्थानीय कलाकारहरूको पनि विशेष प्रस्तुति रहनेछ ।
कार्यक्रममा तामाङ समुदायको मौलिक सांस्कृतिक नृत्य, गीत–संगीत प्रस्तुत गरिनुका साथै तामाङ जातीय परिकार, भेषभूषा प्रदर्शनी तथा तामाङ संस्कार–संस्कृतिसँग सम्बन्धित विभिन्न स्टलहरू पनि राखिनेछन् ।
कार्यक्रम संयोजक सञ्जय ब्लोनका अनुसार फुलकुमार बोम्जन, विशाल काल्तान, सुमिना लो, रेश्मा बोम्जन, उर्गेन दोङलगायत चर्चित गायक–गायिकाको प्रस्तुति रहनेछ भने मोडल याङ्गी दोङ, रिया लामा लगायत कलाकारहरूको पनि सहभागिता रहनेछ ।
घेदुङ बागमती नगर कार्यसमितिका अध्यक्ष रोशन लामाका अनुसार कार्यक्रम सम्पन्न गर्न करिब ११ लाख १५ हजार रुपैयाँ खर्च अनुमान गरिएको छ ।
कलाकार व्यवस्थापनदेखि अन्य सम्पूर्ण खर्च घेदुङले नै व्यहोर्ने उहाँले बताउनुभयो। समितिले विगत तीन वर्षदेखि निरन्तर रूपमा सोनाम ल्होछार विशेष बृहत् कार्यक्रम आयोजना गर्दै आएको छ ।
आयोजकका अनुसार यस मेलाले तामाङ समुदायको मौलिक संस्कृतिको संरक्षण र प्रवद्र्धनमा सहयोग पु¥याउनुका साथै भरतताल क्षेत्रको पर्यटन प्रवद्र्धनमा समेत टेवा पुग्ने अपेक्षा गरिएको छ ।
