काठमाडौं, ३ पुस । नेकपा एमालेको अध्यक्ष पदमा केपी शर्मा ओली लगातार तेस्रो पटक निर्वाचित भएका छन् ।
बुधबार सम्पन्न निर्वाचनमा भारी मतान्तरसहित ओलीले पार्टीको सर्वोच्च नेतृत्वमा पुनः स्थान सुरक्षित गरेका हुन् । यससँगै ओलीले नवौं र दशौं महाधिवेशनपछि पनि एघारौं महाधिवेशनमार्फत तेस्रो कार्यकालका लागि पार्टी अध्यक्षको जिम्मेवारी पाएका छन् ।
निर्वाचन आयोगले सार्वजनिक गरेको पछिल्लो विवरणअनुसार अध्यक्षका उम्मेदवार केपी शर्मा ओलीले कुल १,६६३ मत प्राप्त गरेका छन् । उनका प्रतिस्पर्धी ईश्वर पोखरेलले ५६४ मत प्राप्त गरेका छन् ।
यद्यपि मतगणनाको औपचारिक घोषणा भने हुन बाँकी रहेको निर्वाचन आयोगले जनाएको छ । यसैगरी, नेकपा एमालेको महासचिव पदमा शंकर पोख्रेल विजयी भएका छन् ।
उपमहासचिव पदमा लेखराज भट्ट, रघुवीर महासेठ र योगेश भट्टराई निर्वाचित भएका छन् । नयाँ नेतृत्व चयनसँगै एमालेले आगामी दिनमा पार्टी संगठन सुदृढीकरण, सरकार सञ्चालन तथा राष्ट्रिय राजनीतिमा प्रभावकारी भूमिका निर्वाह गर्ने बताएका छन ।
अध्यक्षमा ओलीको पुनः चयनले पार्टीभित्र नेतृत्वको निरन्तरता र स्थायित्व कायम भएको विश्लेषकहरूको भनाइ छ ।
