काठमाडौं, २ पुस । जेनजी आन्दोलनका क्रममा भदौ २३ र २४ गते भएका घटनाको छानबिन गरिरहेको जाँचबुझ आयोगले आफ्नो म्याद एक महिना थप गर्न सरकारलाई आग्रह गरेका छन् ।
बुधबार सिंहदरबारमा प्रधानमन्त्री सुशीला कार्कीसँगको भेटमा आयोगका पदाधिकारीहरूले बयान लिने काम अझै नसकिएकाले थप समय आवश्यक भएको बताए ।
पूर्वन्यायाधीश गौरीबहादुर कार्कीको नेतृत्वमा ५ असोजमा गठन भएको आयोगको तीन महिनाको म्याद सकिन लागेको छ । आयोग अध्यक्ष कार्कीका अनुसार प्रधानमन्त्रीले म्याद थप गर्ने सकारात्मक संकेत दिएकी छन् ।
आयोगले सुरक्षा र प्रशासनका उच्च अधिकारीहरूको बयान लिइसकेको र आगामी साता पूर्वप्रधानमन्त्री, पूर्वगृहमन्त्री तथा राजनीतिक दलका नेताहरूलाई बयानका लागि बोलाउने तयारी गरेको जनाएको छ ।
