काठमाडौं, १८ मंसिर । प्रधानमन्त्री सुशीला कार्कीले सरकारले तोकिएको मितिमा निर्वाचन गराउने लक्ष्यसहित पूर्ण तयारीका साथ काम गरिरहेको स्पष्ट पारिएकी छन् ।
बिहीबार आयोजित २२औँ राष्ट्रिय ज्यापु दिवस समारोहलाई सम्बोधन गर्दै उनले आगामी २१ फागुनमा हुने आमनिर्वाचन देशको विकास र नेतृत्व हस्तान्तरणको महत्वपूर्ण अवसर भएको उल्लेख गरिन् । प्रधानमन्त्री कार्कीले भनिन्,
‘सरकारले निर्धारित मितिमै आमनिर्वाचन सम्पन्न गरी युवा पुस्ताको हातमा नेतृत्व सुम्पेर मुलुकलाई द्रुत विकासतर्फ अघि बढाउनुपर्ने जिम्मेवारी महसुस गरेको छ । त्यसैले, निर्वाचन तयारीमा सरकारले सम्पूर्ण ऊर्जा केन्द्रित गरेको छ ।
यो प्रक्रियालाई सफल बनाउन सबै नेपालीको साथ–सहयोग अपेक्षित छ ।’ जेनजी आन्दोलनका क्रममा भदौ २३ र २४ गते देखिएका घटनाबाट आवश्यक पाठ सिक्नुपर्ने उल्लेख गर्दै उनले युवा पुस्ताले भ्रष्टाचारविरुद्ध लड्ने, सुशासन कायम गर्ने र रोजगारी, आवास तथा आधारभूत आवश्यकताहरू सुनिश्चित गर्ने अपेक्षा राष्ट्रसमक्ष राखेको बताइन् ।
उनले थपिन्, ‘यी आकांक्षा पूरा गर्न सबैले आफ्नो ठाउँबाट इमानदारीपूर्वक योगदान दिनु जरुरी छ।’
