जनकपुर, १६ मंसिर । मधेश प्रदेशमा उत्पन्न राजनीतिक तनावबीच विपक्षी दलहरूको गठबन्धनले प्रदेश सभाको बैठक तत्काल आह्वान गर्न उपसभामुखसमक्ष आग्रह गरेका छन् ।
सर्वोच्च अदालतले मुख्यमन्त्री सरोजकुमार यादवलाई २४ घण्टाभित्र विश्वासको मत लिन आदेश (परमादेश) जारी गरेपछि नयाँ राजनीतिक समीकरणका लागि प्रदेश सभा जित्ती छिटो बस्नुपर्ने विपक्षी दलहरूको तर्क छ ।
अदालतले विश्वासको मत लिन असफल भएमा वा विश्वासको मत नपाएमा संविधानको धारा १६८(२) अनुसार नयाँ सरकार गठन प्रक्रियामा प्रवेश गर्नुपर्ने स्पष्ट निर्देश दिएको छ ।
सर्वोच्चको आदेश आएपछिल्लो दिन नै नेपाली कांग्रेस, माओवादी केन्द्र, जनता समाजवादी पार्टी नेपाल, लोकतान्त्रिक समाजवादी पार्टी नेपालसहित विपक्षी मोर्चाका प्रतिनिधिहरूले उपसभामुख बबिता राउतलाई दिउँसो ४ बजे बैठक बोलाउन मौखिक अनुरोध गरेका छन् ।
कांग्रेस सांसद अञ्जना पण्डितका अनुसार विपक्षी दलहरूले आफ्ना सांसदहरूलाई जनकपुर बाहिर नजान निर्देशन दिएका छन् । उनले भनिन्, ‘सांसदहरूलाई जनकपुरमै बस्न भनिएको छ। दिउँसो १ बजे आसपास अनौपचारिक छलफल गर्ने तयारी पनि छ।’
नेताहरूका अनुसार सर्वोच्च अदालतको आदेशअनुसार मुख्यमन्त्रीले विश्वासको मत लिए वा नलिए, नयाँ सरकार गठनतर्फ प्रक्रिया अगाडि बढ्ने सम्भावना रहेकाले सांसदहरूको उपस्थिति सुनिश्चित गर्न निर्देश गरिएको हो ।
