काठमाडौं, १५ मंसिर । लगातारको मतभेदपछि नेपाली कांग्रेसले अन्ततः सहमति जुटाउँदै आगामी पुस महिनाभित्र नियमित महाधिवेशन गर्ने निर्णयमा एकमत पुगेको छ ।
सोमबार बसेको कार्यसमिति बैठकमा सभापति शेरबहादुर देउवाले संस्थापन पक्षका असन्तुष्ट नेताहरूलाई समेट्दै महाधिवेशनको कार्यतालिका सर्वसम्मत पारित गर्न निर्देशन दिएपछि लामो समयदेखि चलेको विवाद समाधान भएको हो ।
२३ र २४ भदौमा भएको जेनजी आन्दोलनपछि महामन्त्रीद्वय गगनकुमार थापा र विश्वप्रकाश शर्माको नेतृत्वमा फागुनको प्रतिनिधिसभा सदस्य निर्वाचनअघि नै नियमित महाधिवेशन गर्नुपर्ने माग तीव्र रूपमा उठ्दै आएका थिए।
तर संस्थापन पक्षले त्यो प्रस्ताव असम्भव भन्दै आगामी वैशाखमा गर्ने विकल्पसमेत अघि सारेपछि पार्टीभित्र विवाद चर्किँदै गएको थियो । यसबीच, संस्थापन–इतर पक्षले विशेष महाधिवेशनका लागि हस्ताक्षर संकलन गरेको थियो।
१४औं महाधिवेशनका करिब ५५ प्रतिशत प्रतिनिधिले हस्ताक्षर गरेको निवेदन असोज २८ मा केन्द्रीय कार्यालयमा दर्ता भएको थियो।
कांग्रेस विधानअनुसार कम्तीमा ४० प्रतिशत प्रतिनिधिले हस्ताक्षर गरे तीन महिनाभित्र विशेष महाधिवेशन गर्नुपर्छ भन्ने व्यवस्था भएकाले पुस २८ भित्र विशेष महाधिवेशन सञ्चालन गर्नुपर्ने दबाब पार्टीमा बढेको थियो ।
नियमित वा विशेष महाधिवेशन गर्ने भन्ने विषयमा पार्टी दुई धारमा विभाजित भइरहेका बेला सोमबारको बैठकले पेश गरिएको कार्यतालिका सर्वसम्मत रूपमा अनुमोदन गर्दै समायोजनको मार्ग खुलेको कांग्रेस नेताहरूले बताएका छन् ।
