जनकपुर, १४ मंसिर। मधेश प्रदेशकी वन तथा वातावरण मन्त्री कञ्चन बिछा साहले आइतबार रौतहट जिल्लाको चपुरस्थित डिभिजन वन कार्यालयको स्थलगत निरीक्षण गर्नुभएको छ।
मन्त्री साहले GenZ आन्दोलनका क्रममा भएको व्यापक तोडफोड, आगजनी र ध्वंसजन्य गतिविधिले कार्यालयमा परेको क्षतिको विस्तृत अवस्थाबारे प्रत्यक्ष अवलोकन गर्नुभएको हो।
निरीक्षणका क्रममा कार्यालयका भवन संरचना, प्राविधिक उपकरण, कार्यालय कागजात तथा अन्य भौतिक सम्पत्तिहरूमा गम्भीर क्षति पुगेको जानकारी गराइएको थियो।
कर्मचारीहरूले मन्त्री साहलाई दिएको जानकारीअनुसार कार्यालय अझै पनि पूर्णरूपमा पुनःस्थापित हुन सकेको छैन।
क्षतिग्रस्त संरचनाहरू मर्मत तथा पुनर्निर्माण नहुनुका कारण नियमित सेवा प्रवाहमा समेत चुनौती उत्पन्न भएको छ।
मन्त्री साहले सरकारी सम्पत्तिमा आक्रमण गर्नु गम्भीर अपराध भएको बताउँदै क्षतिग्रस्त संरचनाको शीघ्र मर्मत–सुधार तथा कार्यालयलाई पुनः व्यवस्थित बनाउन आवश्यक प्रक्रिया अघि बढाइने आश्वासन दिनुभएको छ।
साथै, यस्ता घटनाबाट भविष्यमा भएको क्षति न्यूनिकरण गर्न सुरक्षात्मक एवं व्यवस्थापकीय उपायहरू कडाइका साथ लागू गर्न सम्बन्धित निकायलाई निर्देशन दिनुभएको छ। यसै क्रममा मन्त्री साहले बारा र सिमराको डिभिजन वन कार्यालयको अवलोकन गरेका छन।
