काठमाडौँ, १४ मंसिर । राष्ट्रिय स्वतन्त्र पार्टी (रास्वपा) र विवेकशील साझा पार्टीबीच औपचारिक एकीकरणको घोषणा गरिएको छ। काठमाडौँको राष्ट्रिय सभागृहमा विशेष समारोहका बीच आइतबार दुवै पार्टीका शीर्ष नेताहरूको उपस्थितिमा एकता घोषणा पत्र सार्वजनिक गरिएको हो।
यसअघि केही दिनअगाडि दुई दलबीच संगठनात्मक संरचना, पार्टी नेतृत्व, कार्ययोजना र भविष्यको राजनीतिक दिशा–निर्देशबारे व्यापक छलफल सम्पन्न गरी सहमतिपत्रमा हस्ताक्षर गरिएको थियो। सहमति अनुसार एकीकृत पार्टीको नाम ‘राष्ट्रिय स्वतन्त्र पार्टी’ (रास्वपा) नै रहने निर्णय गरिएको छ।
रवि लामिछाने नेतृत्वको रास्वपा र समीक्षा बास्कोटा नेतृत्वको विवेकशील साझाबीच एकता भएपछि उपाध्यक्ष स्वर्णिम वाग्लेले संयुक्त पत्रकार सम्मेलनमार्फत पार्टी नामदेखि नीति तथा संगठनमा सहमति कायम भएको जानकारी दिए।
वाग्लेका अनुसार एकतापछि पनि पार्टीको चुनाव चिन्ह ‘घण्टी’ नै रहनेछ, जसमा दुवै पक्ष एकमत भएका छन्।
एकता सहमतिपत्रमा रास्वपाका तर्फबाट कार्यबाहक अध्यक्ष डोलप्रसाद अर्यालय र उपाध्यक्ष स्वर्णिम वाग्लेले हस्ताक्षर गरेका छन् भने विवेकशील साझाबाट अध्यक्ष समीक्षा बास्कोटा र उपाध्यक्ष प्रकाशचन्द्र परियारले हस्ताक्षर गरेका छन्।
एकीकृत पार्टीले आगामी दिनमा सुशासन, पारदर्शिता र राजनीतिक विकल्पको मजबूत तयारीसहित देशव्यापी अभियान सञ्चालन गर्ने जनाएको छ।
