जनकपुर, १३ मंसिर । जनता समाजवादी पार्टी (जसपा) नेपालका अध्यक्ष उपेन्द्र यादवले समावेशी र न्यायपूर्ण राज्य निर्माणका लागि देशभरका सबै उत्पीडित समुदायहरू एकजुट हुनुपर्ने बताएका छन् ।
दलित, पिछडावर्ग, थारू, आदिवासी तथा अल्पसंख्यक समुदायहरूको परिसंघ धनुषाद्वारा जनकपुरमा आयोजित जिल्ला भेला तथा बृहत् अन्तरसंवाद कार्यक्रममा बोल्दै उनले नेपालमा भएका राजनीतिक परिवर्तनमा दलित, मधेसी, थारू, आदिवासी र अन्य अल्पसंख्यक समुदायहरूको ठूलो योगदान रहे पनि उनीहरूले अपेक्षित सामाजिक न्याय, समान अधिकार र समावेशिताको परिणाम अझै प्राप्त गर्न नसकेको उल्लेख गरे ।
यादवले राज्य संरचना, नीति निर्माण र निर्णय प्रक्रियामा उत्पीडित समुदायको सार्थक तथा समानुपातिक सहभागिता सुनिश्चित गर्नुपर्नेमा जोड दिए ।
उनका अनुसार समानता, न्याय र पहिचानलाई संस्थागत नगरी देशमा स्थायी शान्ति, लोकतान्त्रिक स्थिरता र समृद्धि सम्भव हुँदैन । उनले सबै समुदायबीच एकता र संयुक्त अभियान आवश्यक रहेको बताए ।
कार्यक्रमलाई सम्बोधन गर्दै जसपा नेपालका केन्द्रीय सहअध्यक्ष रकम चेम्जोङले समावेशीकरण, समान अवसर, पहिचानको संरक्षण र सामाजिक न्यायलाई सुनिश्चित गर्न राज्य संयन्त्रले अझ गम्भीर र उत्तरदायी भूमिकामा काम गर्नुपर्ने धारणा प्रस्तुत गरे ।
उनले जसपाले उठाइरहेको पहिचान तथा समान अधिकारको एजेन्डा कुनै एक पार्टीको मात्रै नभई देशभरका उत्पीडित र उपेक्षित समुदायहरूको सामूहिक आवाज भएको बताए ।
कार्यक्रममा परिसंघ धनुषाका संयोजक चन्देश्वर पासवानसहित विभिन्न समुदायका अगुवाहरूले आफ्नो–आफ्नो क्षेत्रमा देखिएका समस्या, अधिकार प्राप्तिमा रहेका चुनौती, आगामी रणनीति तथा समावेशी राज्य संरचनाका आवश्यकताबारे धारणा राखेका थिए ।
सहभागीहरूले समसामयिक मुद्दाहरूमा विस्तृत छलफल गर्दै आगामी दिनमा एकीकृत रूपमा अभियान अघि बढाउने प्रतिबद्धता जनाए। कार्यक्रममा विभिन्न तहका प्रतिनिधि, सरोकारवालाहरू र समुदायका सदस्यहरूको उल्लेखनीय सहभागिता रहेको थियो ।
