जनकपुर, ४ मंसिर । आगामी प्रतिनिधिसभा सदस्य निर्वाचन नजीकिँदै गर्दा धनुषा क्षेत्र नम्बर १ मा नयाँ राजनीतिक व्यक्तित्वका रूपमा उदाउँदै आएका युवा नेता बीपी साहबारे चर्चा निकै तीब्र बन्दै गएको छ ।
लामो समयदेखि पत्रकारिता, सामाजिक सेवा र आन्दोलनमा सक्रिय साह पछिल्ला महिनादेखि मतदातासँग प्रत्यक्ष संवाद, छलफल र सुझाव संकलनमा केन्द्रित छन् । धनुषा जिल्लाको सबैला नगरपालिका–१२, रघुनाथपुर उनको स्थायी निवास हो भने उनको मामाघर धनुषाधाम नगरपालिकामा पर्दछ ।
सामान्य किसान परिवारमा जन्मिएका ३५ वर्षीय साह अहिले राजनीति शास्त्रमा एमफिल–पीएचडी तहमा अध्ययनरत छन् । यसअघि उनले पत्रकारिता तथा आमसञ्चारमा एमए र कानूनमा एलएलबी अध्ययन गरिसकेका छन् ।
प्रारम्भिक शिक्षा गाउँकै विद्यालयबाट सुरु गरेर उनले एसएलसी फकिरचन्द्र गामी उच्च मावि, बरकुर्वाबाट पूरा गरेका थिए । प्लस–टु जनकपुरबाट तथा उच्च शिक्षा काठमाडौँस्थित त्रिभुवन विश्वविद्यालयमा पूरा गरेका छन् ।
पत्रकारिताबाट पहिचान, आन्दोलनबाट लोकप्रियता
साह २०६४ सालदेखि पत्रकारितामा सक्रिय हुँदै आएका छन् । रेडियो नेपालसहित विभिन्न राष्ट्रिय–अन्तर्राष्ट्रिय मिडियामा काम गर्दै उनले नेपालको संविधान निर्माण, संसदीय कार्यप्रणाली, संघीय सरकारका गतिविधि तथा मधेश राजनीतिमा गहिरो अध्ययन र रिपोर्टिङ गरे ।
यसै कारण उनी संघीय संसद् र सरकारको कामकाजबारे जानकार व्यक्तित्व मानिन्छन् । मधेश आन्दोलनका तातेबेला उनी हुलाकी न्यूजका संस्थापक–सम्पादकको रूपमा चर्चामा थिए ।
आन्दोलनको बेला सरकारले उनीमाथि पक्राउ पुर्जी जारी गर्दै वेबसाइट नेपालमा प्रतिबन्ध लगाएपछि उनी केही समय भारतमा भूमिगत रहँदै आन्दोलनलाई निरन्तर अगाडि बढाइरहेका थिए ।
सामाजिक सेवा र मानवीय अभियानको मोर्चामा सक्रिय
साह धनुषा–१ मात्र होइन, मधेशका धेरै जिल्लामा सामाजिक अभियानमा सक्रिय रहे । कोरोना महामारीको समयमा ‘कोही भोकै नबसौँ’ अभियान सञ्चालन गर्दै हजारौँ परिवारलाई राहत तथा दैनिक भोजन उपलब्ध गराए ।
महामारीका कारण मृत्यु भएका वा उपचार अभावले गम्भीर अवस्थामा परेका नागरिकको उपचार व्यवस्थापनमा पनि उनी अग्रसर रहे । गरिब, दलित तथा उत्पीडित समुदायका अधिकारका लागि साह पटक–पटक काठमाडौँ हुँदै तराई–मधेशमा भएका विभिन्न आन्दोलनमा पक्राउ पर्ने नेतामा गनिन्छन् ।
पछिल्लो समय चर्चामा आएको जेनजी आन्दोलन र किसान आन्दोलनमा पनि उनी सक्रिय अगुवाका रूपमा देखिए ।
राजनीतिक यात्रा र चुनावी अनुभव
२०७९ सालमा उनी सबैला नगरपालिकाको मेयर पदमा उम्मेदवार बने । ‘अंगना मे नगरपालिका, मोबाइल स काम’ जस्ता डिजिटल र आधुनिक अवधारणाले मतदाताको ध्यान ताने पनि दलगत गठबन्धनका कारण पराजित भए ।
यद्यपि पहिलो चुनावमै उनले उल्लेखनीय मत ल्याएर प्रभावशाली उपस्थिति देखाए । त्यही वर्षको प्रदेश तथा संघीय चुनावमा उनी धनुषा–१ का चुनावी कमान्डर बने ।
उनले खटाएका उम्मेदवारहरूले प्रतिनिधिसभामा १४ हजारभन्दा बढी तथा प्रदेशसभामा पनि उल्लेख्य मत ल्याए ।
यसपटक सीधै मैदानमा, रोजगारी–शिक्षा–विकास मुख्य एजेन्डा
यस पटक उनी स्वयं धनुषा क्षेत्र नं. १ बाट प्रतिनिधिसभा सदस्यमा उम्मेदवारी दिने तयारीमा छन् । क्षेत्रका रोजगारी, शिक्षा र विकाससम्बन्धी चुनौती समाधान गर्नुपर्ने उनी मान्छन् ।
युवाहरू बाहिरिनुपर्ने बाध्यता घटाउन सक्ने रोजगारमुखी योजनामा विज्ञहरूसँग छलफल चलिरहेको उनले बताएका छन् । साथै सामुदायिक विद्यालयहरूमा गुणस्तरीय शिक्षाको पहुँच बढाउने, स्वास्थ्य तथा पूर्वाधारका क्षेत्रमा टिकाऊ योजना बनाउने र प्रत्यक्ष जनताका सरोकारका विषयलाई संसद्मा जोरदार आवाज बन्ने उनको उद्देश्य छ ।
छलफलका क्रममा साहले मतदातासँग भनेका शब्दहरू चर्चामा छन
“म पढेलेखेको सक्षम उम्मेदवार हुँ भने सहयोग गर्नुस् । मन्त्री–सांसद भएर यस क्षेत्रको विकास नगरेको छु भने मेरो विरोध गर्नुस् । अन्याय–अत्याचारका विरुद्ध बोल्न सक्छु भने मत दिनुस्, जनतालाई धोका दिएको छु भने विरोध गर्नुस् ।
उनको यिनै स्पष्ट र आत्मविश्वासपूर्ण अभिव्यक्तिका कारण धनुषा–१ मा आगामी चुनावी प्रतिस्पर्धा झनै रोचक बन्दै गएको छ ।
