काठमाडौं, १३ कार्तिक । जेनजी आन्दोलनका क्रममा सुदूरपश्चिममा भएको क्षति छानबिनका लागि बनेको आयोगका सदस्य विश्वेश्वर प्रसाद भण्डारी कञ्चनपुर अनुगमनमा पुगेपछि पूर्वमुख्यमन्त्री तथा एमाले नेता राजेन्द्रसिंह रावलले तीव्र असन्तुष्टि जनाएका छन् ।
रावलले भीमदत्त नगरपालिकामा आयोजना गरिएको छलफलमा आयोगमाथि “राज्यको नाटक मञ्चन गरेको” र “अपराधीहरूले छानबिन गर्न आएका” भन्दै आरोप लगाए ।
उनले सदस्य भण्डारीमाथि राज्यको कोष दुरुपयोग गरेको र पक्षपाती रूपमा काम गरेको आरोपसमेत लगाए । रावल र भण्डारीबीचको तीव्र वाक्युद्धपछि कार्यक्रम अव्यवस्थित बनेको र एमालेका जनप्रतिनिधिहरूले बैठक बहिष्कार गरेको जनाइएको छ ।
रावलले आयोग निष्पक्ष नभएको र स्वतन्त्र व्यक्तिबाट मात्र न्यायसंगत छानबिन सम्भव हुने बताए ।
