काठमाडौँ, २१ असोज । गत भदौ २३ को जेनजी आन्दोलनमा मानवताविरुद्धको अपराध भएको भन्दै जेनजी प्रतिनिधि र आन्दोलनका मृतक परिवारले तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकविरुद्ध जाहेरी दिएका छन् ।
उनीहरुले दिएका जाहेरी दर्ता नै नगरी प्रहरीले गौरीबहादुर कार्की नेतृत्वको जाँचबुझ आयोगमा पठाएको छ । उक्त जाहेरीको कार्यक्षेत्र जाँचबुझ आयोग हुने भएकाले त्यहाँ पठाइएको काठमाडौँ प्रहरी परिसरका प्रवक्ता पवन भट्टराईले बताए ।
हामी नेपाल संस्थाका सदस्य र जेनजी आन्दोलनका सहिद परिवार काठमाडौँ प्रहरी परिसरमा जाहेरी बुझाएर निस्किएका छन् । उनीहरू केपी ओली, रमेश लेखकलगाएतलाई पक्राउ गर्नुपर्ने भन्दै जाहेरी लिएर जिल्ला प्रहरी परिसर भद्रकाली पुगेका थिए ।
