जनकपुर, २७ साउन । नेपाल पत्रकार महासंघ मधेस प्रदेशले गुठी संस्थानसँग कानुनी प्रक्रिया पुरा गर्दै २० वर्षका लागि ४ कट्ठा जग्गा भाडामा लिएको छ ।
उक्त जग्गामा महासंघको प्रादेशिक कार्यालय निर्माणको तयारी भइरहेका बेला नेपाल बार एशोसिएशन जनकपुरले बलपूर्वक कब्जा गरेको आरोप लागेको छ ।
महासंघले जनाएको अनुसार सोही स्थानमा कार्यालय स्थापना हुन लागेको सूचना पाएपछि बार एशोसिएशन जनकपुरले आपत्ति जनाउँदै त्यहाँ “पार्किङ स्थल“ को बोर्ड समेत गाडेको थियो ।
महासंघले यस कदमलाई अवैधानिक ठहर गर्दै कडा विरोध जनाएको छ । महासंघका मधेस प्रदेश अध्यक्ष श्यामप्रसाद बनजाराका अनुसार, “हामीले गुठी संस्थानसँग सबै प्रक्रिया पुरा गरेर कानुनी ढंगले जग्गा लिएका हौं ।
तर बारका केही व्यक्तिहरुले बलपूर्वक कब्जा गर्न खोज्नु दुर्भाग्यपूर्ण र गैरकानुनी हो ।“ महासंघका महासचिव शैलेन्द्र क्रान्तिले पनि घटनाको निन्दा गर्दै भने, “हामी कुनै अवैधानिक कामको पक्षमा छैनौं ।
पत्रकारको कार्यालयको स्थापना नहोस् भन्ने मानसिकताले बारले यस्तो व्यवहार देखाएको हो । उनीहरुलाई डर लागेको छ कि कार्यालय नजिकै भएपछि उनीहरुको अनियमितता उजागर हुनेछ ।
दुवै पक्षबीच आज तीव्र भनाभन तथा विवाद समेत भएको थियो । स्थानीय प्रशासनले घटनालाई लिएर कुनै आधिकारिक धारणा सार्वजनिक गरिसकेको छैन ।
यस विवादले पेशागत मर्यादा, कानुनी प्रक्रिया र सार्वजनिक सम्पत्तिको प्रयोगसम्बन्धी बहसलाई फेरि एकपटक सतहमा ल्याएको छ । स्थानीय नागरिकले दुबै पक्षलाई संवादद्वारा समस्या समाधान गर्न आग्रह गरेका छन् ।
