जनकपुर, १२ जेठ । जनकपुर उपमहानगरपालिकामा दुई साँढेबीचको लडाइमा परेर एकजनाको मृत्यु भएको छ ।
सडकमा दुई साढेबीचको लडाईंमा परेर मोटरसाइकल दुर्घटना हुँदा जनकपुर उपमहानगरपालिका ७ का ५० वर्षीय सत्तार राइनको मृत्यु भएको धनुषाका प्रहरी प्रवक्ता डिएसपी बरुण बहादुर सिंहले बताए ।
आइतबार राति साढे ८ बजे जनकपुर ६ पेठियाबजारबाट प्रादेशिक अस्पताल तर्फ जाने बाटो दुई वटा साँढे आपसमा जुधिरहेका थिए । सोही बेला मधेश प्र.०२–००७ प ९२६६ नम्बरको स्कुटीमा जाँदै गरेको राईनको स्कुटीमा साँढे ठोक्किँदा उनी गम्भीर घाइते भएका थिए ।
तत्कालै जानकी हेल्थ केयर जनकपुरमा उपचारको लागि लग्दा ८ः४० बजे उनलाई चिकित्सकले मृत घोषणा गरेको डिएसपी सिंहले बताए ।
घटना बारे थप अनुसन्धान भइरहेको जिल्ला प्रहरी कार्यालय धनुषाले जनाएको छ । जनकपुरको छाडाचौपाया नियत्रण नभएपछि समाजिक सन्जालमा मेयर मनोज साहको विरोध हुदैछ ।
